Ապրիլ 24 թուականը կը յիշեցնէ մեզի, մեր նահատակուած 1,5 միլիոն
արիւնակիցները: 1915-ի ջարդերը աննախընթաց էին իրենց տարողութեամբ,
խժդժութեամբ ու առաջադրութեամբ: Կանխամտածուած և ծրագրուած այս անմարդկային
ոճիրը կատարուեցաւ անխղճօրէն և կատարեալ անտարբերութեամբ: Հինգ տարիներու
ընթացքին Պատմական Հայաստանը պարպուեցաւ իր բնիկ ժողովուրդէն:Մեր
ազգակիցները նահատակուեցան իրենց ազգային ինքնութիւնն ու քրիստոնէական
հաւատքը չզիջանելուն համար:
Այսօր 99 տարիներ ետք, հայ ժողովուրդը
կայ և կ՛ապրի, հայրենիք կը կերտէ, օճախ կը շէնցնէ: Մենք ենք մեր նահատակ
պապերուն միակ ներկայացուցիչները. յիշելով ու յիշեցնելով աշխարհի թէ որքան
ահռելի է ցեղասպանութիւնը և զայն չդապարտելը՝ ոգեկոչենք մեր բիւրաւոր
անշիրիմ ու անմեղ նահատակներ. ներշնչուելով անոնց զոհողութենէն. պահենք մեր
հաւատքը ու ազգային ինքնութիւնը, փոխանցելով մեր զաւակներուն,
ազգասիրութիւնն ու հոգևոր օրհնութեան կարևորութիւնը:
